கரூர் சம்பவம் பற்றி ஒரு மாதத்திற்கும் மேலாக நாம் எல்லோரும் விவாதித்துக்கொண்டிருந்தோம். அதன் பின், ஆந்திராவில் ஒரு கோவிலில் கூட நெரிசல் ஏற்பட்டு உயிரிழப்புகள் ஏற்பட்டது. அது பற்றி ஆந்திராவிலும் கூட அதிகம் பேசப்பட்டதாக தெரியவில்லை. அது ஒரு தனியார் கோவில், முறையான அனுமதி பெறப்பட்டிருக்கவில்லை என்றெல்லாம்  விசாரணையில் தெரியவந்ததாக செய்திகளில் படிக்கிறோம். அது ஏதும் பெரிய விவாத பொருளாகவில்லை.அதன் பின்னர் நடந்த தில்லி கார் வெடிப்பு சம்பவத்தையெல்லாம் நடந்ததும் நாடு மறந்து கடந்து விட்டது.நம் மாநிலத்தில், அநேகம் பேரிடம் அந்த செய்தி சென்றடைந்திருக்குமா என்பதில் கூட எனக்கு சந்தேகம் இருக்கிறது.

இங்கு செய்திகள் அரசியல்வாதிகளின் அரசியல் விளையாட்டுகளுக்காக என்றான பின், கரூர் சம்பவம் போல் எல்லா சம்பவங்களும் மக்களின் பெரும் கவனத்தை பெறுகிறதில்லை.  ஒரு செய்தி மக்களின் கவனத்தை பெற வேண்டும் என்று அரசியல்வாதிகள் தீர்மானிக்க அங்கே ஒரு குற்றவாளி தேவைப்படுகிறார் ஒரு பாவப்பட்ட ஜீவன் தேவைப்படுகிறது. கரூர் சம்பவத்தில் தி.மு.க ஆதரவாளர்கள் விஜயை தரப்பை குற்றவாளி ஆக்கினார்கள். பின், உச்ச நீதிமன்றம் நிர்வாக குறைகளை பற்றி கேள்வியெழுப்பியதும் காட்சிகள் கொஞ்சமாய் மாறியது.  ஆனாலும், நீ தான் நான் தான் என்று குறை சொல்லிக்கொண்டிருக்கும் அரசியல் விவாதங்கள் இன்னும் நடந்து கொண்டு தான் இருக்கிறது.

கும்ப மேளா கூட்ட நெரிசலில் உயிரிழப்புக்கள் ஏற்பட்ட பொழுது, “அப்படி அங்கே ஏன் செல்ல வேண்டும்? என்றெல்லாம் இங்கே பல நாத்தீகவாதிகள் எழுதிக்கொண்டிருந்தார்கள். சம்பவம் நடந்தது உத்தரபிரதேசத்தில் என்பதால் எழுதிக்கொண்டிருந்தார்கள். அந்த ஊர் முதல்வர் என்றால், நம் ஊர் பகுதி நேர  நாத்திகர்களுக்கு அவ்வளவு பிரியம்.

ஆந்திரா, உத்தரபிரதேசம், கரூர் என்று கூட்ட நெரிசலால் ஏற்பட்ட எல்லா விபத்துக்களுக்கும் நிர்வாக குறைபாடுகளே தான் காரணம். அந்த குறைபாடுகள் எல்லாம், இன்னமும் இந்தியா முழுவதும், மத்திய அரசாங்கம், மாநில அரசாங்கம், பஞ்சாயத்து என்று எந்த பாகுபாடும் இல்லாமல் எல்லா இடங்களிலும் இருக்கிறது.ஆந்திராவில், அனுமதி பெறாமல் நடத்தப்பட்டு அத்தனை கூட்டம் கூடிய ஒரு கோவில் அனுமதி பெறாமல் நடத்தப்பட்டு வந்து இருக்கிறது என்று ஒரு அதிகாரிக்கும்  தெரியாமல் இருந்து இருக்கிறது.

இன்று இந்தியா முழுதும், கணக்கு எடுத்தால், அனுமதி பெறாமல் கட்டப்பட்ட கோவில்களோ மற்ற ஆலயங்களோ நிச்சயம் நிறைய இருக்கும். பல கோவில்கள் பழமையானதாக இருந்தும் முறையான பதிவுகள் இல்லாமல் தொடர்ந்து கொண்டிருக்கலாம்.100 சதவீதம் இவையெல்லாம் முறைப்படுத்தப்பட்டுவிட்டதா என்றால்? எந்த தரவுகளையும் தேடாமல் இல்லை என்று சொல்லிவிடலாம்.

இந்த கூட்ட நெரிசல்களில் எதிலெல்லாம் நம்மை பிடிக்காதவர்களை குற்றவாளிகள் ஆக்க முடியுமோ அவர்களை குற்றம் சொல்லி முப்பது நாள் பேசிக்கொண்டிருந்தோம்.நாம் வெறுப்பவர்களை குற்றம் சொல்ல முடிந்ததால் பாதிக்கப்பட்டவர்களுக்காக இரண்டு சொட்டு அதிகம் கண்ணீர் வடித்துக்கொண்டிருந்தோம்.

ஆனால், அரசாங்கம் தீவிரவாத தாக்குதல் என்று வகைப்படுத்திய டெல்லி கார் வெடிப்பு சம்பவம் குறித்து நாம் யாரும் எதையும் கருத்தில் கொண்டதாக தெரியவில்லை. விஜய்க்கு எதிராக இரண்டு சொட்டு அதிகம் கண்ணீர் வடித்தவர்களும்; கும்ப மேளா பற்றி மட்டும் கொந்தளித்த நாத்திகர்களும் ஒன்றும் பேசாமல் கப் சிப் என்று இருக்கிறார்களே!  என்ன  காரணமாக இருக்கும் என்று சிந்தித்தால், இங்கே ஒரு பக்கம் ஆதரவு தெரிவித்து அரசியல் பேசினால் அல்லையில் போட்டு  அலேக்காக தூக்கி கொண்டு போய்விடுவார்கள் என்கிற பயம். அதனால் மறுபக்கம் குறை சொல்லவும் இவர்களால் முடியவில்லை. அதோடு தீவிரவாத தாக்குதலை கண்டிக்கிறோம் என்று சொன்னால் கூட வாக்கு வங்கி என்ன ஆகும் என்று தமிழக அரசியல்வாதிகள் நினைப்பார்களோ என்னவோ,  நம் கூட்டத்தையும் அப்படியே வைத்திருக்கிறார்கள். இதில் ஏதும் கண்டனம் தெரிவித்தால் சமூகம் அமைதியை ஒற்றுமையை கெடுத்து விடும் என்று நம்ப வைத்துள்ளார்கள். தமிழக அரசியல் களத்தை அப்படியே தான் வைத்திருக்கிறார்கள். அதனாலேயே கரூர் சம்பவத்திற்காக ஒரு மாதம் கண்டிப்பு தெரிவித்து கண்ணீர் விட்ட தமிழகம் டெல்லி விஷயத்தில் கண் காதுகளை மூடி அமைதி காத்துக்கொண்டிருந்தது.

ஆனாலும், ஆங்காங்கே இது பா.ஜ.க. வைத்த குண்டு தான் என்றெல்லாம் தமிழகத்தில் சில பதிவுகளை காண முடிந்தது. இவர்கள் எல்லாம் ஏன் தேசிய புலனாய்வு நிறுவனத்தில் சேர முயற்சிகள் எடுப்பது இல்லை என்று தெரியவில்லை!

அசதுத்தீன் ஒவைசி– ஏ.ஐ.எம்.ஐ.எம். கட்சியின் தலைவர் மற்றும் ஹைதராபாத் நாடாளுமன்ற உறுப்பினர், எப்போதும் போல் தயக்கமின்றி இந்த தீவிரவாத தாக்குதலை கண்டித்து இருக்கிறார், சமீபத்தில், தற்கொலை தாக்குதல் தொடர்பாக வெளிவந்த விடியோவை குறித்து இஸ்லாத்தில் தற்கொலை ஹாரம் என்றும், அப்பாவிகளை கொல்வது பெரும் பாவம் என்றும் சொல்லியிருந்தார். இங்கே கடவுள் இல்லை என்று சொல்லும் காபிர்களோடு கூட்டணி வைத்திருப்பவர்களும் ஒன்றும் கண்டனம் என்கிற வார்த்தையெல்லாம் பயன்படுத்தியதாக தெரியவில்லை. இந்த சூழல்களாலேயே இங்கே ஒரு கூட்டம் ஒவைஸி அவர்களை சங்கி என்று சொல்லிக்கொண்டிருக்கிறது.

சரி பா.ஜ.க. தான் குண்டு வைத்தது, அவர்களின் தேர்தல் சித்து வேலைகளில் இதுவும் ஒன்றா என்றால் . இல்லை! முன்னாள் பிரதமர் மன்மோகன் ஆட்சியை ஒப்பீடும் பொழுது, தற்போதைய பா.ஜ.க ஆட்சியில், பயங்கரவாத தாக்குதலாக அரசாங்கத்தால் வகைப்படுத்தப்பட்ட தாக்குதல்கள் குறைந்திருக்கிறது.

இதற்கு பல காரணங்கள் இருக்கிறது. காலம் கொஞ்சம் மாறி வருகிறது தான் ; தொழில்நுட்பம் வளர்ந்துவிட்டது தான் என்றாலும் பாதுகாப்பு சம்மந்தமான விஷயங்களில், பா.ஜ.க. அரசின் அணுகுமுறை வாஜ்பாய் காலத்தில் இருந்தே காங்கிரஸின் அணுகுமுறையில் இருந்து பெரிதும் மாறுபட்டதாக இருக்கிறது. ராஜாங்க ரீதியாக எடுக்கப்பட்ட நடவடிக்கைகள், அரசாங்க கொள்கைகளில் கொண்டு வந்த மாற்றங்கள், பாதுகாப்பை மனதில் வைத்து செயல்படுத்தப்படும் திட்டங்கள். பல வகைகளில், பா.ஜ.கவின் செயல்பாடுகள் காங்கிரேஸை பார்த்து இத்தனை வருஷம் என்ன தான் செய்துகொண்டிருந்தீர்கள் என்று கேட்கும் படிக்கு திறமாக இருக்கிறது.

ஆனாலும், இங்கே ஒரு பொறுப்பாளியை நாம் தேட வேண்டும் என்றால் அது நிச்சயம் பா.ஜ.க. தான். இதை சொன்னதற்கு என்னை ஒரு நண்பர் என்னை உபி என்று சொல்லிவிட்டார். நண்பர்களில் ஒரு சாரர் நம்மை  சங்கி என்று வகைப்படுத்துவதும், மறுசாரர் உபி என்று வகைப்படுத்துவதும் வழக்கமாகி விட்டது. இதையெல்லாம் பார்த்தால் அரசியல் பேச முடியுமா?

சர்தார் படமெடுத்த இயக்குனர், புலனாய்வு துறை 99 அசம்பாவிதங்கள் நடக்காமல் தடுத்திருக்கும், யாருக்கும் தெரியாது. அவர்களின் ஒரு தோல்வி பெரிதாக தெரியும் என்கிற அர்த்தத்தில் பேசியிருந்தார். அவர் சொன்னது சரி தான் அந்த ஒரு தோல்விக்கு நாம் தரும் விலை பெரிதாக இருக்கிறது. அவர்களை குற்றம் சொல்ல வேண்டும் என்பதற்காக இல்லை. ஆனால், இது புலனாய்வு துறையின் தோல்வியாக தான் பாவிக்க வேண்டும் என்று சொன்னதற்கு தான் நண்பர் கோபப்பட்டு விட்டார்.அவர்களும் மனிதர்கள் தானே தவறுகள் நடக்கும் தானே என்றார்.

இப்படி தான் நாம் எல்லா விஷயங்களிலும் தவறு செய்கிறோம். இந்த தவறு தான் எல்லா தவறுகளையும் மீண்டும் மீண்டும் நிகழச்செய்கிறது.

ஆம். மனிதர்கள் தவறு செய்வார்கள் தான் சிஸ்டம் தவறு செய்யாது. வளர்ந்த நாடுகளை எடுத்துக்கொள்ளுங்கள், கடந்த ஒரு வருடத்தில் எத்தனை நாடுகளில். கூட்ட நெரிசலால் உயிரிழப்புகள் ஏற்பட்டு இருக்கிறது. கடந்த சில வருடங்களில் எத்தனை முறை வளர்ந்த நாடுகளில் தீவிரவாத தாக்குதல் நடந்திருக்கிறது. தேட வேண்டும்,ஆனால், இந்தியாவில் இதெல்லாம் எப்போது நடந்தது என்று கேட்டால் ,நேத்து கூட நடந்ததே என்று சொல்லுமளவிற்கு இருக்கிறது. காரணம் இது தான் மனிதர்கள் தவறு செய்வார்கள் என்கிற காரணத்தின் பின்னால் நிர்வாக கோளாறுகளை  ஏற்றுக்கொண்டு மேம்பட மறுப்பது.

சிஸ்டம் தவறு செய்யாது, ஒரு வேளை சிஸ்டத்தில் ஒரு குறை இருந்து தவறு நடந்து விட்டால், அதே தவறு மீண்டும் நடக்காதவாறு அந்த சிஸ்டம் கவனமாக இருக்கும் படி தன்னை மேம்படுத்திக்கொள்ளும். பிழையை பொறுத்துக்கொள்ள முடியாது இருத்தல் தான் சிஸ்டம் தன்னை மேம்படுத்திக்கொள்ளும் வழி வகுக்கும் (zero tolerance to error).

 அமெரிக்கா அப்படித்தான் இருக்கிறது. வளர்ந்த நாடுகளெல்லாம் அப்படித்தான் இருக்கிறது. அதையெல்லாம் விட்டுவிடுங்கள், நம்முடைய  உடலின் தற்காப்பு அமைப்பும் கூட அப்படி தான் இருக்கிறது. வளர்ந்த நாடுகளும் வளர்ந்து கொண்டே தான் இருக்கிறது.வளர்ந்த நாடுகள் என்று அறியப்படுகிற  எல்லா நாடுகளும் ஒரு பெரிய சாலையில் ஓடுகிறார்கள் என்றால் இந்தியா ட்ரேட் மில்லில் ஓடிக்கொண்டு இருக்கிறது.

பாலங்கள் இடிந்து விழுவது மீண்டும் மீண்டும் நிகழ்ந்திருக்கிறது. கூட்ட நெரிசல் மரணங்கள் மீண்டும் மீண்டும் நிகழ்ந்திருக்கிறது.சிவகாசி பட்டாசு ஆலை விபத்துகள் மீண்டும் மீண்டும் நிகழ்ந்திருக்கிறது. நிர்பயா வழக்கு  சம்பவம் நடந்தது 2012 கோவையில்  அதே போன்ற குற்றம் மீண்டும் நிகழ்ந்திருக்கிறது.

பயங்கரவாத தாக்குதல்கள் மீண்டும் மீண்டும் நிகழ்ந்திருக்கிறது.இந்த தாக்குதல்களுக்கு முன்னால், புலனாய்வு துறை எச்சரிக்கை விடுத்தது என்பார்கள், ஆனாலும் நடந்திருக்கும். பகல்ஹாம் தாக்குதல் அப்படியான ஒன்று தான்.சுற்றலா தளங்கள் குறிவைக்கப் படலாம் என்கிற எச்சரிக்கை விடுக்கப்பட்டதாக செய்திகளில் படித்தோம்.  மிக சாதரணமாக யோசித்தாலும்,சுற்றலா தளங்களிலேயே பயங்கரவாத தாக்குதல் நடக்க அதிகம் வாய்ப்பிருக்கிற ஒரு மாநிலத்தில் தாக்குதல் நடந்திருக்கிறது. அங்கே ராணுவம் வந்த சேர தாமதம் ஆகியிருக்கிறது என்றால். நம்முடைய சிஸ்டம் எவ்வளவு மோசமாக இருக்கிறது.

சர்ஜிக்கல் ஸ்ட்ரைக்கிற்கும், சிந்தூர் ஆபரேஷனுக்கும் சொந்தம் கொண்டாடி தேர்தலை லாபம் பெற நினைக்கிற கட்சியை தான் இதற்கு பொறுப்பாக்க முடியும்.50 ஆண்டுகளுக்கும் மேல் பாதுகாப்பு சார் விஷயங்களில் பெரிய வேகமான முன்னேற்றங்களை செய்யாமல் விட்ட காங்கிரசை பொறுப்பாக்குவது நியாயமாகாது.

மும்பை தாக்குதல் நடந்த இத்தனை வருடங்கள் கழித்து மீண்டும் பஹல்ஹாம் வரை ஆயுதங்களை கொண்டு வந்து ஒரு கூட்டத்தால் தாக்குதல் நடத்த முடிகிறது என்றால், அது மனிதர்கள் செய்யும் தவறுகள் அல்ல.சிஸ்டத்தில் இருக்கும் ஓட்டை.

ஒரு சிஸ்டமாக புலனாய்வு வளர்ச்சியில், கண்காணிப்பு மிக முக்கியமாகிறது, கண்காணிப்பு என்பது கேமரா மூலம் கண்காணிப்பது மட்டும் கிடையாது. இன்னமும் நம் தேசத்தில் எங்கோ எதையோ யாரோ வெடிக்க செய்யாமளவிற்கு வெடிப்பொருள்கள் சுலபமாக கடத்தப்படுகிறது எனலாம்.வெடிபொருள்களை கையாள்வதற்கான நெறிமுறைகளை மேம்படுத்த வேண்டும்.டெல்லி கார் வெடிப்பு சம்பவத்திற்கு பின் எதை எதையோ கண்டுபிடிக்கிறார்கள். காஷ்மீரில் வெடிப்பொருள்களை கைப்பற்றுகிறார்கள், கைப்பற்றிய வெடிப் பொருள்கள் வெடித்து காவல்நிலையத்தில் 9 பேர் இறந்து போகிறார்கள். இதெல்லாம் மனிதர்கள் செய்யும் பிழையால் ஏற்படுவது அல்ல.வெடிபொருட்களைக் கையாள்வதில் உள்ள சட்டப் பலவீனங்கள் மற்றும் முறையான பயிற்சி, வழிகாட்டுதல் இல்லாமை இதற்கு காரணம்.

 இதையெல்லாம் பாஜக இன்னும் சரி செய்யவில்லை என்று சொல்லலாம் தானே!

இதிலெல்லாம் பாரத சமூகம் தன்னை மேம்படுத்திக்கொள்ள மிக முக்கியமான தேவை ஒற்றுமை. இங்கே பாகிஸ்தானில் இருக்கும் தீவிரவாத முகாம்களை தாக்கினால் ஒரு கூட்டம் போர்க்கொடி தூக்கிக்கொண்டு வருகிறது. நாட்டுக்காக உயிர் தியாகம் செய்த ராணுவ வீரர் பற்றி படம் எடுத்தால்,அதை குறை சொல்லி நாட்டை ஆக்கிரமித்து இருக்கிறவர்களுக்கு ஆதரவாக ஒரு கூட்டம் கிளம்புகிறது.காஸாவில் போர் நடக்கிறது. போர் என்றால் இரண்டு பக்கமும் உயிரிழப்புகள் இருக்கும். இரண்டு பக்கங்கள் நியாய அநியாயங்கள் இருக்கும். அங்கே ஏதோ ஒரு பக்கம் இருக்கும் மகாத்மாக்களுக்கு எதிராக வன்முறை நிகழ்வது போல இங்கே கண்டன ஆர்ப்பாட்டங்கள் நடக்கிறது. வெளிநாட்டு விவகாரங்களில், அரசின் நிலைப்பாடு என்ன என்பதை பற்றி எந்த சிந்தனையும் இல்லாமல் இங்கே அரசியல் என்கிற பெயரில் தேசத்தின் மீது வெறுப்பை பரப்பிக்கொண்டிருக்கிறார்கள்.

நாம் நம்மை பலப்படுத்துக்கொள்ள பல்வேறு துறைகளில், பல்வேறு நிலைகளில் பல மாற்றங்கள் செய்ய வேண்டி இருக்கிறது. சமீபத்தில், நம்முடைய விமானங்கள் சுட்டு வீழ்த்தப்பட்டதாக சீனா தான் பொய் செய்தியை பரப்பியது என்று அமெரிக்காவில் இருந்து செய்தி வெளியாகிறது. ஒரு பக்கம் சில விஷயங்களில் அமெரிக்காவிற்கு எதிராக ஒன்று சேர சீனா நேசக்கரம் நீட்டுகிறது. மறுபக்கம் நட்பு பாராட்டுகிற அதே வேளையில் அமெரிக்கா நமக்கு சில நிர்பந்தங்களை ஏற்படுத்துகிறது. இப்படியான பிரச்சனைகளை எல்லாம் தாண்டி தான் ஒரு தேசம் தன்னை பாதுகாப்பு சார் விஷயங்களில் பலப்படுத்திக்கொள்ள வேண்டும். அதற்கு முதலில் செய்ய வேண்டியது பல வகைகளில் எல்லா துறைகளிலும்  தன்னிச்சையாக இயங்கும் அளவிற்கு நாம் நம்மை வளர்த்துக்கொள்ள வேண்டும். உள்நாட்டு சட்டதிட்டங்களை ஏற்க மறுத்த வெளிநாட்டு சமூக வலைத்தளங்களை நேபாள் அரசு தடை செய்தததும் அந்த அரசு கவிழ்க்கப்படுகிறது. அதை சுட்டி நாம் நமக்கு என்று தனியான சமூக வலைத்தளங்கள் வைத்துக்கொள்ள வேண்டும் என்று சுட்டியிருந்தோம். சமீபமாக ஜோஹோ பிரபலமானது, அது கண்டு மகிழ்ச்சியடைவதற்குள்.ஸ்ரீதர் வேம்பு ஒரு சங்கி என்று கிளம்பிவிட்டார்கள்.

அப்துல் கலாமை யாரும் சங்கி என்று சொல்ல மாட்டீர்கள் என்று நம்புகிறேன். பொக்ரான் அணுகுண்டு சோதனையின் நடத்தியதற்காக  நம் மீது பொருளாதார தடைகள் எல்லாம் விதிக்கப் பட்டது. அது குறித்து கலாம் என்ன சொல்கிறார்? அப்படியான வெளிப்புற சூழல் மாறுபாடுகள் நம்மை பாதிக்காதபடி நாம் நம்மை வளர்த்துக்கொள்ள வேண்டும் என்கிறார். எந்த ஒரு நாடு நம் நாட்டின் எந்த ஒரு முடிவின் மீது தலையீடு செய்யமுடியாத அளவு வளர, நாம் மற்ற நாடுகளை எதற்கும் சார்ந்திருப்பதை குறைத்துக்கொள்வதோடு, மற்ற நாடுகள் நம்மை அதிகம் சார்ந்திருக்கும் படி வளர வேண்டும் அது தான் அவர் சொன்னதின் அர்த்தம். அப்படி நாம் வளர வேண்டுமென்றால், தேசப்பற்று வளர வேண்டும். சுதேசி பொருள்களை நாம் ஆதரிக்க வேண்டும். ஒரு இந்தியர் ஒரு நாள் உழைத்து 300 ரூபாய் சம்பாரிக்கிறார் என்றால் அதில் 100 ரூபாய் செலவழித்து ஒரு ஆங்கில படம் பார்க்கிறார் என்றால் இந்தியரின் உழைப்பு அந்த நாட்டின் வளர்ச்சிக்கு உதவுகிறது.  ஒரு youtuber பத்து நாள் வேலை செய்து 10 ரூபாய் சம்பாதிக்கிறார் என்றால், அவரின் அதே உழைப்பை வைத்து  youtube தான் அதிகம் சம்பாதிக்கிறது.எப்படி பல விஷயங்களில் நம்முடைய உழைப்பு மேலை நாடுகளின் வளர்ச்சிக்கு உதவுகிறது.அதை மீறி எங்கோ ஒரு குரல் வலுத்தால் இங்கே இருக்கும் லகர பாண்டிகள் சங்கிகள் என்று முத்திரை குத்துகிறார்கள்.அதோடு இந்தியா நாடே இல்லை அது ஒரு கூட்டு, பொரியல் என்று வருகிறார்கள்.

ஏன் டா? தீவிரவாத தாக்குதல் பற்றி ஆரம்பித்து எங்கையோ போகிறாய் என்று நினைக்காதீர்கள். ஒரு நாடு ராணுவம் புலனாய்வு போன்ற துறைகளில் அசுர பலம் பெற்று வளர வேண்டுமென்றால் அதன் பொருளாதாரம் வளர்ந்திருக்க வேண்டும்.பொருளாதாரத்தை வளர்க்க வழி செய்யாமல் ராணுவ நடவடிக்கைகளை தீவிரப்படுத்தும் நாடு இலங்கை போல் திவால் ஆக வாய்ப்பு இருக்கிறது. ராணுவ கட்டமைப்புகளையும், புலனாய்வு துறைகளையும் பலமாக வைத்திருக்கும் நாடுகள் நம்முடைய உழைப்பை சேர்த்துக்கொண்டு அவர்கள் வளத்தை வளர்த்துக்கொண்டு இருக்கிறார்கள்.

ஒரு  நாட்டின் பாதுகாப்பை உறுதி செய்ய ஒரு அரசு பொருளாதாரத்தை வளர்த்துக்கொள்வது மக்களிடையே பிரிவினை உணர்வு அல்லாத ஒற்றுமையை வளர்த்தெடுப்பது பழைய தவறுகள் நடக்க அனுமதிக்காத படி சட்டத்திருந்தங்கள் செய்வது என்று எல்லாவற்றிலும் கவனம் செலுத்த வேண்டிய தேவை இருக்கிறது. மோடி ஆட்சியில் இது போன்ற தாக்குதல்கள் குறைந்து இருக்கிறது என்று நாம் ஆசுவாசம் கொள்ள முடியாது.தவறுகள் மீண்டும் மீண்டும் நடக்க வாய்ப்பளிக்கிற அளவில் நிர்வாகம் பலவீனமாக தான் இருக்கிறது என்பதை நாம் ஏற்றுக்கொள்ள தான் வேண்டும்.

 இது என் வீடு, என் நாடு என்கிற உணர்வு  எல்லோருக்குள்ளும் வளர வேண்டும்.ஹிந்தியை வளர்ப்பதை விட அரசு கொள்கைகளும் இந்திய அரசியலமைப்பம் அந்த உணர்வை வளர்ப்பதை தான் முதல் நோக்கமாக கொள்ள வேண்டும். மாநிலங்கள் மொழிவாரியாக பிரிக்கப்பட்டு இருக்க கூடாது. அதைவைத்துக்கொண்டு இன்று வரை தேசிய கட்சிகளும் கூட சிண்டு முடியும் அரசியலை கையில் எடுத்துக்கொண்டிருக்கும் பொழுது எப்படி நாட்டின் ஒற்றுமை வளரும். காஷ்மீரில் இருக்கிறவன் என் காஷ்மீர் என்று தான் இருப்பான் அவன்  நம்முடைய வரிப்பணத்தில் படித்துவிட்டு நமக்கு எதிராகவே செயல்படுவான். இங்கே அரசு பள்ளியில் படித்துவிட்டு சினிமா எடுத்து அரசியலுக்கு சென்று இந்தியா நாடு இல்லை என்று பேசுவான்.

இப்படி பேசுகின்ற அரசியல்வாதிகளின் பதவிகள் எல்லாம் பறிக்கப்பட வேண்டும்.ஒரு சுதந்திர தின வாழ்த்து குறிப்பில் கூட முதல்வர் இந்திய ஒன்றியம் என்கிறார், இந்திய நாடு என்று குறிப்பிடாமல், ஒடிசா தேர்தல் பரப்புரையில், தமிழரை எப்படி ஆள விடலாம் என்கிறார் மத்திய அமைச்சர். இவர்களின் அரசியல் சண்டை தேசம் என்கிற உணர்வை பலவீனப்படுத்திய பிராந்திய கட்சிகளோடு கூட்டணி ஆட்சி அமைக்க தேசிய கட்சியான காங்கிரஸ் செய்துகொண்ட சமரசம் இதெல்லாம், நம்முள் இருக்கும் தேசபற்றை மழுங்க செய்து இருக்கிறது. அது மீண்டும் துளிர்விட்டு பெரிதாக வளர வேண்டும். நாங்கள் இந்தியர் என்பது தான் எல்லா இந்தியர்கள் மனதிலும் இருக்க வேண்டும்.

அப்படியான உணர்வு வளரும் பொழுது, தேசம் தானாக வளரும், எந்த துறைகளிலும் குறை குற்றம் இருக்காது. பொருளாதாரம் மேம்படும். அப்ப ஊழல்? என்று கேட்பீர்கள், தேசத்தை நேசிக்கின்ற ஒரு தலைமுறையை உருவாகிவிட்டாலே ஊழலும் தானாக ஒழிந்துவிடும்.

இப்படி ஒற்றுமையை வளர்த்து எல்லா துறைகளிலும் நாம் வளர்ச்சி அடைந்துவிட்டால், நாம் நம் ராணுவத்தை இன்னும் பலப்படுத்திக்கொள்ளலாம், தேசத்தின் எந்த மூலையில் தாக்குதல் நடத்தப்பட்டாலும் சில நிமிடங்களில் ராணுவம் அந்த இடத்தை அடைகிற அளவிற்கு ராணுவ வீரர்களின் எண்ணிக்கையை அதிகப்படுத்த வாய்ப்பு ஏற்படும்.

காஷ்மீரில் உள்ளவனிடமும்   தமிழக்தில் உள்ளவனுனிடமும்  இது காஷ்மீர் இல்லை இது தமிழகம் இல்லை இது இந்தியா இது என் தேசம் என் வீடு என்கிற உணர்வை வளர்த்து விட்டால் அவன் இந்தியாவிற்குள் இருந்தே இந்தியாவிற்கு எதிராக பேசவோ செயல்படவோ மாட்டார்கள்.

அரசியல்வாதிகளை விட்டுத்தள்ளுங்கள் அவர்கள் அதிகார சண்டைக்கு நம்மை பிரித்துதான் வைத்திருப்பார்கள், அதனால் தான் நாம் வடக்கன் என்றும் மதராஸி என்றும் கோல்டி என்றும்  மனதால் உணர்வால்  பிரிந்துகிடக்கிறோம். இந்த உணர்வை நாமாக மாற்றிக்கொள்வோம். அதனால், தினமும் உங்களுக்குள் நீங்களே சொல்லிக்கொள்ளுங்கள் இது என் தேசம், என் வீடு. இந்திய நாடு நம் வீடு ! இந்தியர் என்பது நம் பேரு(று)