ஞாயிற்றுக்கிழமை– நிச்சயம் இந்த நாள் அநேகமானவர்களின் ஓய்வு நாளாக இருந்திருக்கும். விடிந்ததும் நாம் எல்லோரும் மீண்டும் நம் பொறுப்புகளை சுமந்துகொண்டு ஓட வேண்டும். இப்படி ஓடும் பொழுதுகளில் எப்போதேனும் ஒரு வேலையும் இல்லாமல் உங்களுடைய பொறுப்பை மறந்து நீங்கள் என்ன வேலை செய்ய வேண்டுமோ அதைவிடுத்து எதையாவது ஒன்றை இழுத்துக்கொண்டு; பொறுப்பாக வேலை செய்வது போல உங்களை நீங்களே ஏமாற்றிக்கொண்டு இருக்கீர்களா?இங்கு நிறைய பேர் அப்படியிருக்கிறார்கள்.

 எங்கள் நிறுவனத்தில் ஒரு மார்க்கெட்டிங் மேலாளர் இருக்கிறார், கிழக்காசிய நாட்டைச் சேர்ந்தவர். அவர் சார்ந்த நாட்டின் பெரு நிறுவனங்களில், பெரிய பொறுப்புகளில் இருப்பவர்களுக்கு ஆங்கிலம் தெரியாது. அவர் அல்லாமல் எங்களிடம் இந்த மார்க்கெட்டிங் பிரிவில் இன்னும் சில மேலாளர்கள் நிர்வாகிகள் எல்லாம் இருக்கிறார்கள்.

ஒரு நிறுவனத்தில், மார்க்கெட்டிங் பிரிவில் இருக்கின்ற நிர்வாகிகள் மேலாளர்களின் பங்கு என்ன? அவர்களுடைய பொறுப்புகள் என்னென்ன? அவர்களுடைய பங்கும் பிரதானமான பொறுப்பும் சந்தைப்படுத்துதல். எங்கள் நிறுவனம் இன்னின்ன வேலைகளை செய்துகொடுக்கிறது, நாங்கள் இந்த வேலைகளை இந்த விலைக்கு செய்துகொடுக்கிறோம் என்று வாடிக்கையாளர்களை ஈட்டுவது தான் அவர்களின் வேலை.அவர்கள் அதைத்தவிர மற்ற வேலைகளை எல்லாம் செய்வார்கள்.

 ஒரு இனிப்பு கடை இருக்கிறது என்று வைத்துக்கொள்ளுங்கள், கடையின் இருப்பை பார்த்து சாதாரணமாக சில வாடிக்கையாளர்கால்  வருவார்கள்.

எங்களுடைய  மார்க்கெட்டிங் மேலாளர் என்ன செய்வார், இந்த இனிப்பு கடைக்கு வரும் வாடிக்கையாளர்கள் போல், எங்களிடம் இயல்பாக வரும் வாடிக்கையாளர்களுக்கு நாங்கள் செய்து கொடுக்கும் வேலைகளுக்கு  விலை நிர்ணயம் செய்வதில் பங்குகொள்வது,அவர் நாட்டை சேர்ந்த ஆங்கிலம் தெரியாத வாடிக்கையாளர்களுக்கு  வாடிக்கையாளர்களிடம் மொழிபெயர்ப்பாளராக செயல்படுவது; அவர் நாட்டைச் சேர்ந்த வாடிக்கையாளர்கள் மொழி பிரச்சனை காரணமாக அவர் மூலமாகவே எல்லா தொடர்புகளையும் வைத்துக்கொள்வதால், வேலையைப் பற்றிய புரிதல் இல்லாமல், இது முடிந்ததா அது முடிந்ததா என்று பொறியாளர்களை விரட்டுவது என்று இருப்பார். ஆனால், அவருடைய பணி என்ன?நிறைய வாடிக்கையாளர்களை கொண்டு வருவது. சரி! மொழி பிரச்சனை காரணமாக அவர் சில கூடுதல் உதவிகளை நிறுவனத்திற்கு செய்ய வேண்டி உள்ளது என்று வைத்துக்கொள்வோம்.அந்த பிரிவின் மற்ற நிர்வாகிகளும் கூட அவர்களின் பிரதான பொறுப்பு என்ன என்பதை மறந்து ஏதோ ஒரு வேலையை தான் செய்துகொண்டிருக்கிறார்கள்.

எல்லோருக்கும் புரிகிற மாதிரியான ஒரு உதாரணத்தை எடுத்துக்கொள்வோம். ஒரு பள்ளியில் தலைமை ஆசிரியர் இருக்கிறார். அவர் என்ன செய்ய வேண்டும்? அந்த பள்ளி எப்படி இயங்க வேண்டும் என்கிற வழிகாட்டுத்தல்களை உருவாக்க வேண்டும். அப்படி உருவாக்கிவிட்டு அந்த வழிகாட்டுதல் படி யார் எப்படி நடந்து கொள்ள வேண்டும் யார் எந்த பொறுப்புகளை எடுத்து கவனித்துக்கொள்ள வேண்டும் என்று பொறுப்புகளை பகிர்ந்தளிக்க வேண்டும். அவ்வப்பொழுது இதெல்லாம் சரியாக நடக்கிறதா என்று கண்காணிக்கலாம். உதாரணமாக, பள்ளி காவலாளியிடம் 9 மணிக்கு மேல் யாரையும் உள்ளே அனுமதிக்காதீர்கள் என்று கட்டளையிடலாம். அதற்கு பின் யாரும் உள்ளே அனுமதிக்கப்பட்டது தெரிய வந்தால், எங்கே தவறு நடந்தது, காவலர் எப்படி அனுமதித்தார் என்பதை ஆராய்ந்து மீண்டும் அப்படி நடக்காமல் இருக்க என்ன செய்யலாம் என்று சில நெறிமுறைகள் மேம்படுத்தலாம். ஆனால், எனக்கு தெரிந்த ஒரு தலைமை ஆசிரியர் என்ன செய்கிறார், ஊடகங்களை அழைத்துக்கொண்டு பள்ளி காவலர் அவர் பணியை சரியாக செய்கிறாரா என்பதை கண்காணிக்க நானும் அவரோடு அவ்வப்பொழுது வாசலில் நிற்கிறேன் என்பதை விளம்பரப்படுத்தி; பள்ளியை கவனித்துக்கொள்ள தானே சம்பளம் பெறுகிறேன் என்று பன்ச் பேசுகிறார்.

அந்த தலைமை ஆசிரியர் ஆங்கிலத்தில் பட்டம் பெற்றவர்; உங்கள் மகனுக்கு கணக்கு வரவில்லை கொஞ்சம் கவனித்து கொள்ளுங்கள் என்று நீங்கள் புகார் அளித்தால், உங்கள் மகனோடு சேர்ந்து, நான்கு செய்தி ஊடகங்களை  செய்தி ஊடகங்களை வைத்துக்கொண்டு புகாரை அடுத்து களத்தில் இறங்கி உங்கள் மகனோடு நானும் கணக்கு பாடம் கவனிக்கிறேன், கணக்கு வாத்தியார் ஒழுங்காக கற்றுக்கொடுக்கிறாரா என்று பார்க்கிறேன் என்று களத்தில் இறங்கிவிடுவார்.  ஆங்கிலத்தில் உங்கள் மகன் தொடர்ந்து கோட்டை விடுகிறான் என்றால், உங்களை போனில் அழைத்து, இது தெரியாமல் நடந்துவிட்டது, இனிமேல் இப்படி நடக்காது சாரி! என்பார்.

இந்தியாவில் தோராயமாக 85 சதவீத அரசியல்வாதிகள் இந்த தலைமை ஆசிரியர் போலவும், எங்கள் மார்க்கெட்டிங் மேலாளர் போலவும் தான் நடந்து கொள்கிறார்கள் அவர்களின் பணி என்ன? அவர்களின் பிரதானப் பொறுப்பு என்ன? அதைப்பற்றி அவர்கள் சிந்திப்பதே இல்லை.

இங்கே ஒரு அச்சு வார்ப்பு(டெம்ப்ளட்) இருக்கிறது. அதை ஒட்டி  அச்சு பிசகாமல் என்ன செய்ய வேண்டுமோ  அதைத்தான் செய்கிறார்கள். நாமும் அவர்களிடம் அதையே தான் எதிர்பார்க்கும்படி செய்கிறார்கள்.நடிகர் விஜயின் வார்த்தைகளில் சொல்ல வேண்டுமென்றால் சம்பிரதாய அரசியல். அதை நான் செய்ய மாட்டேன் என்று விட்டு அதே சம்பிரதாயங்களுக்கு புது வண்ணம் பூசி அவரும் டெம்ப்ளட்க்குள் தான் இருக்கிறார்.

துணை முதல்வர் உதயநிதி, சமீபத்தில் வெள்ளம் தடுப்பு நடவடிக்கைகளை ஆய்வு செய்த பொழுது கிச்சன் சென்டர் அமைத்து இருக்கின்றோம்; ஆங்காங்கே மோட்டார் பம்ப்கள் வைத்து நீரை வெளியேற்றும் பணி நடக்கிறது; முதல்வர் அந்தந்த மாவட்ட ஆட்சியர்களிடம் காணொளி மூலம் பேசி துரித நடவடிக்கைகள் எடுக்க சொல்லியிருக்கிறார். இப்படியெல்லாம் நாங்கள் எப்படி வேலை செய்கிறோம் என்று விளக்கிக்கொண்டிருந்தார். அப்பொழுது ஒரு நிருபர், நேற்றும் ஆய்வு செய்தீர்கள் இன்று ஆய்வு செய்கிறீர்கள் நீங்கள் ஆய்வு செய்ய என்ன தேவை இருக்கிறது என்று ஒரு கேள்வியை முன்வைக்கிறார், அதற்கு பதிலளித்த துணைமுதல்வர்,  அதற்கு தானே மக்கள் எங்களை தேர்ந்தெடுத்து இருக்கிறார்கள் என்றார்.அதை வைத்துக்கொண்டு அவரின் கட்சி ஆதரவாளர்கள்  எல்லாம் நாளைக்கு நாற்பது தடவை மயிர்க்கூச்சம் அடைந்து கொண்டு இருக்கிறார்கள்.

அந்த நிருபர் கேட்ட கேள்வி சரி தான். ஒரு துணை முதல்வர் தொடர்ந்து இரண்டு நாட்களாக இந்த ஆய்வை செய்ய வேண்டிய தேவை இருக்கிறதா? ஏன் ஆய்வு செய்ய கூடாதா?என்று சிலர் கேட்பீர்கள். செய்யலாம். ஆனால் இதை மட்டுமே செய்து கொண்டிருக்க கூடாது.இந்த ஆய்வுகள் மழைக்காலத்திற்கு முன்னதாக செய்து, வடிகால் சம்மந்தமான பணிகள் இத்தனை சதவீதம் தான் முடிந்திருக்கிறது, அதனால் சில இடங்களில் நீர் தேங்கும் வாய்ப்பிருக்கிறது, அங்கெல்லாம் முன்னெச்சரிக்கை நடவடிக்கையாக நீரை வெளியேற்ற ஏற்பாடுகள் செய்யப்பட்டு இருக்கிறது என்று சொல்லியிருக்கலாம். வடிகால் சம்பந்தமான பணிகள் 90 சதவீதம் பணிகள் முடிந்துவிட்டது என்று சென்ற ஆண்டு இவர்கள் சொன்னதாக ஞாபகம்.

தண்ணி எங்கு நிற்கிறதோ அங்கு போய் நில்லு என்று அப்பா பணிக்கிறார் என்பதெல்லாம், எங்காவது எதையாவது செய்து ஓட்டை பெற வேண்டும் என்பது மட்டுமே தான் இவர்கள் நோக்கமாக நோக்கமாக கொண்டிருக்கிறார்கள் என்பதை தான் காட்டுகிறது.அது தான் சிக்கலே. “அதுக்கு தான் மக்கள் தேர்தெடுத்திருக்கிறார்கள்” என்கிற பிரச்சார நெடி கொண்ட பதிலும் வாக்கு சேர்க்கும் மனப்பாங்கின் வெளிப்பாடு தான்.

 துணைமுதல்வரின் தாத்தா ஐந்து முறை முதல்வராக இருந்தவர். 1967 க்கு பிறகு, 1984 மற்றும் 2011 தவிர்த்து, மற்ற தேர்தல்களில் எதிர்க்கட்சி அந்தஸ்த்தைப்பெற்றவர்கள். துணை முதல்வரின் தந்தை துணை முதல்வராக இருந்த சமயத்தில், சிங்கப்பூர் சென்று அந்த நாட்டில் மாசுபட்டிருந்த நதியை எப்படி மீட்டெடுத்தார்கள் என்பதை கேட்டறிந்து அதே போல் கூவம் நதியை மீட்டெடுக்க போகிறோம் என்றெல்லாம் சொல்லியிருந்தார்கள். ஆனால், இன்று வரைநதியையும் மீட்கவில்லை ; வெள்ள தடுப்பு நடவடிக்கைகளையும் ஆய்வு செய்துகொண்டு மட்டும் தான் இருக்கிறார்கள். அவருடைய தாத்தா ஆய்வு செய்தார், அவருடைய அப்பா ஆய்வு செய்தார், இப்பொழுது இவர் ஆய்வு செய்கிறார். இடையில் இரும்பு  லேடி வேறு, அவரும் ஆய்வு தான் செய்தார்.

`

இந்த ஆய்வின் பயன் என்ன? இந்த ஆய்வுக்கென்று என்ன வழிகாட்டுத்தல்களை அரசு பின்பற்றுகிறது? மோட்டார் ஓடவில்லை என்றால் கையை வைத்து சுற்றுவார்ர்களா?  ரத கஜ துரக பதாதிகள் சூழ நான்கு கேமரா பின்தொடர நடந்து கொண்டே இருப்பதால் யாருக்கு என்ன பயன்?

சென்னையை விட இருமடங்கு மழை பெய்யும் சிங்கப்பூரில், பிளாஷ் பிளட்(flash flood) என  அறியப்படும் சில நிமிடங்கள் மட்டுமே தேங்கும் தீடீர் வெள்ளம் கூட அரிதாகவே தான் பார்க்க முடியும். நாலாயிரம் கோடி செலவு செய்து, 90 சதவீதம் பணிகள் முடிந்து விட்டது என்று சொல்லிவிட்டு டிராக்டர் பம்ப் செட்டும் வைத்துக்கொண்டு அந்த அரசாங்கத்தின் அமைச்சர்கள் தெருவில் இறங்கி கூத்து நடத்தி பன்ச் பேசுவதில்லை. அந்த அரசாங்கம் ஒரு தொடர் பணியை மிக சரியாக செய்து கொண்டு வருகிறது. ஒரு நீண்ட கால திட்டத்தை வரைவு செய்து அதை தொடர்ந்து மேம்படுத்தி சரியாக செயல்படுத்திக்கொண்டு வருகிறது.

சாலைகளில் வீடுகளில் என்று சிங்கப்பூரின் நிலப்பரப்பில் எந்த மூலையில் ஒரு மழைத்துளி விழுந்தாலும் அது சாக்கடையோடு கலக்காமல் எப்படி சேகரிக்க  வேண்டும் என்கிற கட்டமைப்பை அவர்கள் ஏற்படுத்தி வைத்திருக்கிறார்கள். மனித உடம்பின் நரம்புகள் போல அவர்கள் நிலப்பரப்பில் உள்ள அத்தனை மழைநீர் வடிகால்களும் ஒன்றாக இணைக்கப்பட்டு, அது ஆங்காங்கே உள்ள ஏரி குளங்களோடு இணைக்கப்பட்டு இருக்கும்.

நாம் ஒரு வீடு கட்டுகிறோம், என்னவெல்லாம் சிந்திப்போம்? வீடு நீண்ட காலத்திற்கான ஒரு இருப்பிடம் அதை எப்படியெல்லாம் திட்டமிடுவோம், அதை நாம் கட்டப்போவதில்லை, ஒரு பொறியாளரிடம் நம் தேவைகளை திட்டங்களை எடுத்துவைப்போம், அவர் சாத்தியங்களை ஆராய்ந்து, அதை நமக்கு கட்டி தருவார். சிங்கப்பூர் அரசியல்வாதிகள் அவர்கள் நாட்டை அப்படி தான் கட்டமைத்து இருக்கிறார்கள். வீடுகள் இப்படி தான் கட்டப்பட வேண்டும்.சாலைகள் தோறும் வீடுகள் மழை நீர் வடிகால் இருக்க வேண்டும் எல்லாம் ஒன்றாக இணைக்க பட்டிருக்க வேண்டும். நீர்நிலைகள் குப்பைகளை காணாதவாறு, குப்பைகளை கையாள வேண்டும் என்கிற நீண்ட கால தேவைகளை வல்லுனர்களிடம் முன்வைத்து அவர்களோடு சேர்ந்து பெரிய திட்டங்களை தீட்டி அதை நடைமுறைப்படுத்திக் கொண்டிருக்கிறார்கள்.

 துணைமுதல்வரும் அவருடையும் அப்பாவும் தாத்தாவும்  இரும்பு பெண்மணி என்று நாம் நம்பியவரும் என்று இவர்கள் யாரும் மெத்த படித்த மேதாவிகள்  இல்லை, அமைச்சர்கள் படித்தவர்களாக இருக்க வேண்டியதும் இல்லை. நமக்கு என்ன தேவை என்று கேட்க தெரிந்தவர்களாக இருந்தால் போதும் .

இவர்கள் நாங்களும் வேலை செய்கிறோம் என்று இப்படி ஆய்வுகள் மூலம் காட்டிக்கொள்ள நாம் இவர்களை தேர்ந்தெடுக்கவில்லை. மக்களும் கூட எல்லாவற்றிக்கும் மேல் நிலையில் இருக்கிறவர்கள் வந்து பார்வையிட வேண்டும் என்கிற எதிர்பார்ப்பை மாற்றிக்கொள்ள வேண்டும். தலைமை என்பது மூளையை போன்றது, கை என்ன செய்ய வேண்டும் என்று அது கட்டளையில் இடலாம், அதை சரிபார்க்க கண்களை பணிக்கலாம். கைகள் செய்கிற வேலையை மூளை எப்படி செய்ய முடியும். நீங்கள் ஒரு வீட்டை கட்டுகிறீர்கள், அங்கே பொறியாளரின் வேலை என்ன? வீட்டிற்கான திட்டத்தை வரைவு செய்வது, பொருள்களை சரியாக தேர்ந்தெடுத்து வாங்குவது, பட்ஜெட்டிற்குள் வேலையை முடிப்பது, சரியான வேலையாட்களை தெரிவு செய்து அவர்களை கண்காணிக்க சரியான மேற்பவையாளர்களை நியமிப்பது. வீட்டின் உரிமையாளரோ பொறியாளரோ தினமும் ஆய்வு மட்டுமே செய்து கொண்டிருந்தால் அவர்களின் வேலையை யார் பார்ப்பது?

அரசை மக்கள் சார்பாக நடத்துகிற தலைவர்கள் படித்திருக்க வேண்டியதில்லை. இந்த நாட்டிற்கு என்ன தேவை என்பதை சரியாக  தெரிந்து கொண்டிருந்தால் போதும், எங்குவேண்டுமென்றாலும், எப்படி வேண்டுமென்றாலும் வீட்டு மனைகளுக்கு அனுமதி கொடுத்துவிட்டு ஒரு நகரத்திற்கான எந்த கட்டமைப்பும் இல்லாமல் வீடுகள் அதிகரித்த பின், அங்கே சாலையிடுவது, அதன் பின் அதை சாக்கடைக்காக தோண்டுவது, அதன் பின் பாதாள சாக்கடைக்காக தோண்டுவது என்று எதிர்காலம்  பற்றிய எந்த தொலைநோக்கு பார்வையும் எப்போதும் இல்லாமல் தான் இப்போதும் அரசியல்வாதிகள் இருக்கிறார்கள். இவர்கள் இந்த சிஸ்டத்தை எந்த வகையிலும் மேம்படுத்தவில்லை. நகரங்களாகிவிட்ட அநேகமான கிராமங்களின் சாலைகள் முப்பது வருடங்களுக்கு முன்பிருந்த அதே அகலத்தில் தான் இப்பொழுதும் இருக்கிறது. ஒரு நிலப்பரப்பில் இருக்கின்ற வயல்வெளிகள் மனையிடங்களாக மாறும் பொழுதே அரசு  அங்கே ஏற்படுத்தப்பட வேண்டிய வசதிகளைப் பற்றி கருத்தில் கொள்வதே இல்லை.

வெள்ள பாதிப்புகள் எப்போதும் எல்லா காலங்களிலும் இருந்து கொண்டிருக்கிறது, இப்பொழுது தான் சென்னையில் மழைநீர் வடிகால்களை பெரு முயற்சியோடு கட்டமைக்கிறார்கள். மற்ற மாவட்டங்களில் உள்ள சாலைகள் தெருக்கள் என்று மாநிலம் முழுதும் மழைநீர் வடிகால்கள் எப்போதோ கட்டமைக்கட்டிருக்க வேண்டும்.அதற்கெல்லாம் இவர்கள் இன்னும் எத்தனை காலம் எடுத்துக்கொள்வார்களோ? புதிததாக அனுமதிக்கப்படும் மனையிடங்களில் இந்த வசதிகள் நிச்சயம் இருக்க வேண்டும் என்கிற நெறிமுறைகள் இருக்கிறதா நிச்சயம் இல்லை.வயல்கள் மனையிடங்களாகி தெருக்களாகி மழை நீர் தேங்கிய பின் பார்வையிட்டு ஆய்வு செய்து. அதன் பின் வடிகால்கள் அமைத்து.இதெல்லாம் எப்போது நிகழ்ந்தேறும் என்பது போன்று தான் இந்த அரசாங்கம் வேலை செய்கிறது.

கரூர் துயர சம்பவம் அரசியல் கவனம் பெற்றதாலும் அதற்கு முன்பாகவே கூட்ட மேலாண்மை அரசியல் பேரணிக்கு அனுமதி அளிக்க வழிகாட்டுதல்களை நிறுவ சொல்லி நீதிமன்றம் பணித்து இருந்ததாலும், இப்படி கூட்டங்களை எப்படி நிர்வகிக்க வேண்டும் என்று நெறிமுறைகளை அரசு வகுக்கும் என்று முதல்வர் தெரிவித்து இருந்தார்.

ஆனால், பென்னிக்ஸ் கொலை வழக்கை வைத்து பெரிய அரசியல் செய்த தி.மு.க ஆட்சிக்கு வந்த பின் 24 மரணங்கள் நிகழ்ந்து இருக்கிறது.இப்படி ஒரு சம்பவம் மீண்டும் நிகழாமல் இருக்க இதுவரை ஏதும் சட்டதிட்டங்கள் மேம்படுத்தப்பட்டதாக தெரியவில்லை.எங்கள் முதல்வர் அஜித்குமார் குடும்பத்தை போனில் அழைத்து ஆறுதல் சொன்னாருல்ல என்று தி.மு.கவினர் பெருமிதம் கொள்கிறார்கள்.

தி.மு.க. அ.தி.மு.க என்கிற பாரபட்சம் இல்லாமல். நம்முடைய அரசாங்கம் பல நிலைகளில் தேக்கம் அடைந்து தான் இருக்கிறது. சிவகாசி தீ விபத்து பற்றி இரண்டு கட்சிகளும் எதிர்கட்சிகளாக இருக்கும் பொழுது விமர்சித்து கொண்டே தான் இருக்கிறது. இது வரை எந்தவொரு நிரந்தர தீர்வும் எட்டப்படவில்லை. தொடர்ந்து மூன்று தலைமுறை ஆட்சியில் இருந்து, ஆட்சியில் இல்லாத சமயத்தில் அரசை கேள்வி கேட்கிற இடத்திலும் இருந்துவிட்டு இப்படியான பிரச்சனைகளை தொடர்கதையாக்கி பாதிக்கபட்டவர்கள் நேரில் சந்தித்தோம், போனில் அழைத்தோம் இதற்காக தான் மக்கள் தேர்ந்தெடுத்திருக்கிறார்கள் என்று பேசுவதெல்லாம் பெருமையாக நினைத்துக்கொண்டிருக்கிறார்கள்.

தீபாவளியை ஓட்டி எல்லோரும் கடைகளுக்கு சென்று இருப்பீர்கள் அநேகமான பெரிய கடைகளில்  தீடீரென்று ஒரு அசம்பாவிதம் நடக்கிறது எனில் அந்த கடையில் இருக்கும் எல்லோரையும் வெளியேற்ற சரியான பாதை இருக்காது. சில மருத்துவமனை கட்டுமானங்கள் கூட மருத்துவமனை நடத்த ஏதுவானதாக இருக்காது. அவசர வாகனங்கள் வருவதற்கும் போவதற்கும் அந்த கடை இருக்கும் சாலையில் இடம் இருக்காது. தமிழகம் நீங்கள் பிறந்தது முதல் இப்பொழுது வரை இப்படித்தான் இருக்கிறது. ஆனால், ஐந்து முறை முதல்வராக இருந்த தாத்தாவின் பேரன் குடும்பம் நீங்கள் பிறந்ததற்கு பிறகு பெரும் வளர்ச்சி அடைந்திருக்கிறது.

என் நாடு என் ஊரு எப்படியெல்லாம் மேம்பட வேண்டும் என்கிற பெருங்கனவு கொண்ட ஒருவன் தலைவனான சில வருடங்களில் , இந்த சிஸ்டம் சரியாக வேலை செய்துகொண்டிருக்கும்.அவன் நாம் சுட்டிக்காட்டிய மார்கெட்டிங் மேலாளர் போன்றோ, தலைமை ஆசிரியர் போன்றோ துணைமுதல்வர் போன்றோ இருக்க மாட்டான். அவன் இருப்பும் பெயரும் இந்த சிஸ்டத்தை சரியாக இயக்கி கொண்டிருக்கும்,

அவன் அவனுடைய வீடு எப்படியெல்லாம் இருக்க வேண்டும் என்று எண்ணுகிறானோ அதைப்போல் இந்த நாட்டை கட்டமைப்பான், இந்த அரசு இயந்திரத்திடம் அவன் மக்களுக்கு என்னவெல்லாம் வசதிகள் இருக்க வேண்டும் என்று கேட்டுப்பெறுவான். அவன் மக்கள் கொண்டாடும் எல்லா பண்டிகைக்கும் தயக்கமின்றி வாழ்த்து தெரிவிப்பான்.சாலைகளில் மழைநீர் தேங்காது, நீர்நிலைகளில், கால்வாய்களில் குப்பைகள் இருக்காது, கூட்ட நெரிசலில் மக்கள் இறக்க மாட்டார்கள், தீ விபத்துகள் தொடர்கதையாக இருக்காது. மெட்ரோ பணிகள் நடக்கும்  பொழுது யார் தலையிலும் பாலம் இடிந்து விழாது.காவல்துறையினர் யார் மரணத்திற்கும் காரணமாக இருக்க மாட்டார்கள்.அதனால் அமைச்சர்கள் இதையெல்லாம் நேரில் பார்வையிட தேவையும் இருக்காது.   

அப்படியொரு தலைவன் அவனுடைய பொறுப்புகளைப் பற்றி சரியாக அறிந்திருப்பான். அவனை எதற்காக மக்கள்  தேர்ந்தெடுத்திருக்கிறார்கள் என்பதை தீர்க்கமாக அறிந்திருப்பான். அதிகாரத்தின் மீது இருக்கின்ற கவனத்தை விட இந்த நாட்டை எப்படி கட்டமைக்கிறோம் என்பதில் அவன் கருத்தாக இருப்பான்.