இந்தியாவில் வாக்கு திருட்டு அல்லது மோசடி இப்போது நடக்க வாய்ப்பிருக்கிறதா ? இதற்கு முன் நடந்திருக்கிறதா? எப்படியெல்லாம் நடக்கலாம்? என்று அலசினால், வரலாறு நம்மை மாண்புமிகு முதல் பிரதமர் நேரு மாமா அவர்களிடம் கொண்டு சென்று நிறுத்துகிறது.

 என்னளவில்,  நம் வரலாறு கற்பித்த அல்லது நம் மத்தியில் பிரபலப்படுத்தப்பட்ட சுதந்திர போராட்ட வீரர்கள் மீது எனக்கு பெரிய ஈர்ப்பு இருந்ததில்லை.  காரணம்,இந்தியாவில் இருந்த அரசர்கள் அவர்களின் அதிகாரத்திற்கும் செல்வத்திற்கும் குந்தகம் வராத வரையில் ஆங்கிலேயர்கள் நம்மை ஆட்சி செய்வதை பற்றி எந்த அக்கறையும் அவர்கள் கொண்டிருக்கவில்லை. வாரிசு இழப்புக் கொள்கை (Doctrine of lapse) என்று ஒன்றை கிழக்கு இந்திய கம்பெனி கொண்டு வந்தது. வாரிசு இல்லாத அரசுகளை கிழக்கு இந்திய கம்பெனி சொந்தமாக்கி கொள்ளும் என்பது தான் அந்த கொள்கை. ஐந்தாம் வகுப்பில் சுதந்திர போரில் ஈடுபட்ட ஜான்சி ராணியின் வீரத்தைப் பற்றி படித்து சில்லறை சிதறவிட்டுவிட்டு பத்தாம் வகுப்பிற்கு வந்து  doctrine of lapse-வாரிசு இழப்புக் கொள்கை படித்தால் நமக்கு ஒரு பெரிய  கேள்வி எழுகிறது.இவர்களின் நோக்கம் என்ன ? இவர்கள் மக்களின் சுதந்திரத்திற்காக போர் செய்யவில்லை; அவர்களின் அதிகாரம் பறிபோகிறது என்று போர் புரிந்து இருக்கிறார்கள்.

கட்டபொம்மன் ஆற்காடு நவாபிற்கு வரி செலுத்திக்கொண்டிருந்தார். கிழக்கு இந்திய கம்பனிக்கு கடன்பட்ட நவாப் பாளையக்காரர்களிடம் வரி வசூல் செய்யும் உரிமையை கிழக்கு இந்திய கம்பெனிக்கு எழுதிக்கொடுக்கிறார்; கட்டபொம்மன் செலுத்த வேண்டிய வரி பாக்கி அதிகம் இருக்க; அதை ஜாக்சன் துறை கேட்ட விதம், கட்டபொம்மன் ஜாக்சனை நேரில் சந்திக்க முயற்சிகள் எடுத்தும் ஜாக்சன் சந்திக்க மறுத்தது, இறுதியாக சந்தித்த பொழுதும் மரியாதை குறைவாக நடத்தியது இதெல்லாம் தான் அவரை வெகுண்டெழச்செய்கிறது. மக்களுக்காக வெகுண்டெழுந்தாரா என்று கேட்டால் சந்தேகம் தான்.

எல்லா சுதந்திர வீரர்களும் இப்படித்தானா என்று கேட்பீர்கள் என்றால் நிச்சயமாக இல்லை. சுதந்திர போராட்டத்தில் ஈடுபடாதவரிகளிலும் கூட தேசாபிமானம் கொண்ட அநேகம் பேர் பிரிட்டிஷ் இந்தியாவில் இருந்தார்கள். டாடா விவேகானந்தர் போன்றவர்கள் அப்ப்டியானவர்களே.கல்யாணம் செய்து குடும்பமாக இருக்க வேண்டிய  வயதில் நாடு சுதந்திர அடைய வேண்டும் என்று தன்னுயிரை தியாகம் செய்த பஹத் சிங் போன்றவர்களின் முன்னெடுப்புகளை டாடா, விவேகானந்தர் போன்றவர்களின் முயற்சிகளை நாம் எப்போதும் சிறுமையாய் நினைத்தது இல்லை.

எப்படி அதிகாரத்திற்கு பங்கம் வந்த பின் வெகுண்டெழுந்த அரசர்கள் சுந்தந்திர போராட்ட வீரர்கள் என்று நமக்கு உருவகப்படுத்தப்பட்டார்களோ அதே போல் சில தலைவர்கள் இருக்கிறார்கள். அவர்கள் பெயர்களை சொல்வதற்கு முன்னர் நீங்கள் நினைத்து பாருங்கள், வ.ஊ.சி. அனுபவித்தது போன்ற கடுமையான தண்டனையை அவர்கள் பெற்றிருக்க மாட்டார்கள்.  அந்தமான் சிறையில் கைதிகளாக இருந்திருக்க மாட்டார்கள்.  இந்தியா சுதந்திரம் அடைவதற்கு முன்னதாகவே தேர்தலை கேலிக்குள்ளாக்கியவர்கள் அவர்களே தான்.

இந்திய தேசிய காங்கிரஸ் தலைவருக்கான போட்டி வேட்பாளரை பரிந்துரைக்க தகுதியான 15 பேர் குழுவில் 12 பேர் படேலை பரிந்துரைக்கிறார்கள். தகுதியில்லாத வெகு சிலர் நேருவை பரிந்துரைக்கிறார்கள். தேர்தல் நடந்தால் எப்படியும் படேல் தான் வென்றிருப்பார், நாட்டின் முதல் பிரதமராகவும் ஆகியிருப்பார்.காரணம், எப்படியும் நாடு சுதந்திரம் அடைந்ததும் காங்கிரஸ் தான் ஆட்சி அமைக்கும் அதன் தலைவர் தான் பிரதமர் ஆவார் என்பது அப்போதைய தலைவர்களுக்கு தெரிந்து தான் இருந்தது. அதோடு,காந்தி முதலான அத்தனை தலைவர்களுக்கும்  நாடு சுதந்திரம் அடையப்போகிறது என்பது தெரியும். 1945இல் ஐக்கிய நாடுகள் சபை சாசனம் காலனி ஆதிக்கத்தில் இருக்கின்ற நாடுகளுக்கு சுதந்திரம் தர வழி செய்தது. அப்போதைய அரசியல் போக்கில், 1930களிலேயே வட்ட மேசை மாநாடுகள் நடத்த தொடங்கி இந்தியாவின் அரசியலமைப்பை பற்றி விவாதிக்க முன்னெடுப்புகள் தொடங்கிவிட்டது. 1934க்கு முன்பு இங்கிலாந்து சென்று திரும்புவதற்கு முன்பு வரை இந்தியா மீது பற்றுக்கொண்டிருந்த ஜின்னா 1934 க்கு பின்பு  இஸ்லாமியர்களுக்கு என்று தனி அமைப்பு தொடங்கினார். அந்த அமைப்போடு சிறுபான்மையினரின் பாதுகாவலன் என்று இப்போது பேசுகின்ற காங்கிரசின் அப்போதைய நேரு போன்ற தலைவர்கள் இணக்கமாக செயல்படாததால் தனி நாடு கோரிக்கைக்கு சென்று இந்தியா இரண்டு நாடுகளாக பிரிவதற்கு ஜின்னாவும் காரணமாக அமைந்தார்.

 அரசர்கள் தொடங்கி நேரு ஜின்னாஹ் வரை எல்லோரும் அவர்களின் நிலைகுறித்து அவர்களுக்கு கிடைக்கின்ற அதிகாரத்தை பற்றிய சிந்தனையில் தான் இருந்தார்கள். ஜின்னாஹ் பாகிஸ்தானின் தந்தையானார், ஜனநாயக முறையிலான தேர்தலை பைபாஸ் செய்து நேருவை காங்கிரஸ் தலைவராக்கிய காந்தி இந்தியாவின் தந்தையானார்.

 இப்போது ஏன் இதை பேச வேண்டும்? இப்போதைய அரசியல் தலைவர்களும் நேரு போன்றவர்களாகவே தான் இருக்கிறார்கள். படேல் போன்று நாட்டுக்கு நன்மை நடந்தால் சரி தலைமை பொறுப்பில் தான் இருக்க வேண்டுமென்பதில்லை என்று நினைக்கிறார்கள் இல்லை. அதன் விளைவு தான் ஒரு சீர்திருத்த நடவடிக்கை மீது இவர்கள் பொய் பிரச்சாரங்களை முன்னெடுக்க காரணமாக இருக்கிறது.

தற்போதைய காங்கிரஸ் கட்சியின் நிலையானது, அவர்களின் போட்டி கட்சியான பாஜகவை எப்படியும் வீழ்த்த முடியாத நிலையில் இருக்கிறது. எதாவது செய்ய வேண்டும் என்று அவர்கள் பாஜகவை தாக்க பொய்களை அள்ளிக்கொண்டு வருகிறார்கள். இதை படித்ததும் நீங்கள் என்னை சங்கி என்று நினைக்கலாம். ஆனால், இரண்டு தேசிய கட்சிகளில் ஒரு தேசிய கட்சி பலமான எதிர்க்கட்சியாக கூட இல்லாமல் இருக்கிறதே என்கிற வருத்தம் எனக்கு நிறையவே இருக்கிறது.

 காங்கிரஸ் இப்போதும் கூட தங்களை வலுப்படுத்திக்கொள்ள நினைக்காமல், ஒரு தேசிய கட்சியாக இருந்துகொண்டு, தேசிய எண்ணத்திற்கு மாறுபட்டு தங்களுக்கு எதிராக தொடங்கப்பட்ட பிராந்திய கட்சிகளின் ஆதரவில் காலம் தள்ளலாம் என்று நினைத்துக்கொண்டு இருப்பது தான் காங்கிரஸின் மிக பெரிய குறை.அவர்கள் அவர்களின் ஆயுதத்தை பலப்படுத்திக்கொள்ளாமல், எதிரியின் இரும்புக்கோட்டை மீது குண்டூசி வைத்துக் குத்திக் கொண்டிருக்கிறார்கள். அப்படியொரு குண்டூசி தான், தீவிர  வாக்காளர் பட்டியல் சீர்திருத்தத்தை (SIR)வாக்கு திருட்டு என்று குற்றம் சுமத்தும் போக்கு.

இங்கே இந்த கட்சிகள் என்ன செய்கிறது என்று உற்று நோக்கினால் நமக்கு புலப்படுவது இது தான்,  நிர்வாகத்தின்  சாதாரணமான ஒரு நடவடிக்கை மீது மக்களுக்கு அவநம்பிக்கையை ஏற்படுத்தி ஒரு குழப்பத்தை உருவாக்கி அதன் மூலம் அதிகாரத்தை கைப்பற்ற வேண்டும் என்று இவர்கள் நினைக்கிறார்கள் அதற்கு மக்களை ஆயுதமாகவும் கேடயமாகவும் பயன்படுத்துகிறார்கள்.

நீங்கள் சிந்தியுங்கள்–உங்கள் வாக்கு எப்போதேனும் திருடப்பட்டிருக்கிறதா? நீங்கள் வாக்குசாவடிக்குச் சென்றால், அங்கே எல்லா கட்சியையும் சார்ந்த பூத் ஏஜென்ட்கள் இருப்பார்கள், தேர்தல் ஆணைய கட்டுப்பாட்டில்  இருக்கும் மாநில அரசின் பணியாளர்கள் இருப்பார்கள். உங்கள் பெயர் பட்டியலில் இருக்கிறதா என்று சரி பார்க்கப்படும். உங்கள் அடையாள அட்டையை நீங்கள் காண்பிக்க வேண்டும். பின்னர் விரலில் மை வைப்பார்கள் அதன் பின்னர் வாக்கு செலுத்த அனுமதிக்கப்படுவீர்கள்.இங்கே வாக்கு திருட்டு எப்படி நடக்கும்.

 உங்கள் வாக்கு திருடப்பட வாய்ப்பு இருக்கிறது. அது எப்படி? வாக்கு செலுத்தும் நாளில், ஒரு வாக்கு சாவடியில் வாக்களிக்க வேண்டிய ஆயிரம் பேர் வாக்கு செலுத்தவில்லை என்றால், கடைசி நேரத்தில், அங்கே இருக்கும் கட்சியினர் அவர்களுக்குள் பேசி ஆளுக்கு 100 வாக்குகள் என்று பிரித்து கொள்ளும் பட்சத்தில்,  வாக்கு திருட்டு நடக்க வாய்ப்பு இருக்கிறது. இதை தவிர்க்க தான் நோட்டா கொண்டு வரப்பட்டது. வாக்களிக்க விருப்பம் இல்லையென்றாலும் மக்கள் அதை பதிவு செய்ய அது வழி செய்தது. அப்போதும், வேறு சில காரணங்களால் எல்லோராலும் வாக்கு செலுத்த முடிவதில்லை.நீங்கள் வாக்கு செலுத்த வாக்குச்சாவடிக்கு செல்லாத பட்சத்தில், உங்கள் வாக்கு திருடப்பட வாய்ப்பு இருக்கிறது. அது ஒரே கட்சிக்கு சாதகமாக அமைய வாய்ப்புகள் குறைவு.

  இந்தியாவில் , இந்த வாக்காளர் பட்டியல் சீர்திருத்த பணி நடப்பது முதல் முறையல்ல. இதற்கு முன்னதாகவும் நடந்து இருக்கிறது. வாஜ்பாய் பிரதமராக இருந்த சமயத்திலும், மன்மோகன் அவர்கள் பிரதமராக இருந்த சமயத்திலும் இது நடந்திருக்கிறது.

 இந்த திருத்தம் ஏன் தேவைப்படுகிறது? நம்முடைய தரவுகள் இந்தியாவில் ஒருங்கிணைக்கப்பட்டதாக இல்லை. வளர்ந்த சில நாடுகளில், நீங்கள் ஒரு முகவரியில் இருந்து வேறு முகவரிக்கு மாறினால், அது உங்களின் எல்லா தரவுகளிலும் தானாக புதுப்பிக்கப்படும் அல்லது புதுப்பிக்க சொல்லி அறிவுறுத்தப்படும். உதாரணமாக நாம் நம்முடைய பான் அட்டை, வங்கி கணக்கு இவற்றையெல்லாம் ஆதரோடு இணைத்திருப்போம்; இப்போது நாம் நம்முடைய ஆதாரில் முகவரியை மாற்றியிருந்தால், வங்கியில் இருந்து உங்களை அழைத்து ஏற்கனவே இருக்கும் தரவுகள் ஆதார் தரவுகளோடு பொருந்தவில்லை; அதனால், புது ஆதார் நகலை கொடுத்து தரவுகளை புதுப்பித்துக்கொள்ளுங்கள் என்பார்கள். இப்படியான ஒரு நடைமுறை வாக்காளர் பட்டியல்  பராமரிப்பு முறையில் இல்லை. அதனால் இந்தியாவில் என்ன நடக்கிறது?

இறந்தவர்கள் வாக்காளர் பட்டியிலில் இருப்பார்கள்.இவர்களின் வாக்குகளை நாம் முன் சுட்டிக்காட்டியது போல கட்சி நிர்வாகிகள் கடைசி நேரத்தில் பங்கு போட்டுக்கொள்ள வாய்ப்பு இருக்கிறது. சிலர் இடம் மாறுதல் செய்த பிறகு, புது இடத்தில் வாக்காளர் அட்டை பெற்று இருப்பார்கள். ஆனால், அவர்கள் இருந்த முந்தைய தொகுதியிலும் அவர்களின் பெயர் பட்டியலில் இருக்கும். இந்த குழப்பங்கள் இந்தியாவில் தொன்று தொட்டு இருக்கிறது. இது அல்லாமல், பழைய வாக்காளர் அட்டையில் எழுத்துப்பிழை இருக்கும். பெண்களின் அட்டையில் அப்பா பெயர் இருக்கும். ஆனால் அவர்களின்  மற்ற அடையாள அட்டையில் கணவரின் பெயர் இருக்கலாம். அதனால் இந்த வாக்காளர் பட்டியல் திருத்தம் என்பது அவ்வப்பொழுது செய்யப்பட வேண்டிய ஒன்று தான்.  இதை செய்யாமல் விட்டால் தான், இல்லாத வாக்குகளை கூட கட்சிகள் தங்குளுக்குள் பங்கு போட்டுக்கொள்ளச் செய்யும் வாய்ப்பை அது ஏற்படுத்தும்.

காங்கிரஸ் தி.மு.க போன்ற கட்சிகள் இதில் என்ன செய்கிறது? முதல்வர் ஸ்டாலின் அவர்கள்,”சகோதரர் ராகுல் காந்தி வாக்காளர் சீர்திருத்தம் என்பது வாக்கு திருட்டு நடவடிக்கை தான் என்று ஆதாரங்களோடு பேசியிருக்கிறார்” என்பது போன்ற கருத்தை தெரிவித்து இருந்தார். ஆதாரம் இருந்திருந்தால், வழக்கு தொடர்ந்து இருக்கலாமே! ஏன் செய்யவில்லை? ராகுல் வாக்காளர் பட்டியிலில் இருந்த குழப்பங்களை பட்டியிலிட்டாரே தவிர அதை வைத்து வாக்கு திருட்டு எப்படி நடக்கிறது என்பது பற்றி அவர் தெளிவாக சொல்லவும் இல்லை அதற்கு ஆதாரமும் அவரிடம் இல்லை.வாக்கு திருட்டு என்பது, போலியான வாக்குகள் ஒரே கட்சியை சேர வேண்டும்.அப்படி நடப்பதற்கான வாய்ப்புகள் இல்லை. அது எல்லா கட்சிகளுக்கும் தெரியும். அப்படி நடக்க வாய்ப்பு இருந்தால் வடிவேல் சொல்வது போல அரசியல் கட்சிகள் இதை ரத்த பூமியாக மாற்றியிருப்பார்கள்.

இதில் விந்தை என்னவென்றால், தேர்தல் வெற்றிகளை மாற்றியிருப்பார்கள் என்கிற சந்தேகம் அல்லது குற்றச்சாட்டு(ப.சிதம்பரம் அவர்களின் வெற்றி), நம்பிக்கை வாக்கெடுப்புக்கு எதிர்கட்சி உறுப்பினருக்கு லஞ்சம் கொடுத்த குற்றச்சாட்டு, தேர்தல் வெற்றி செல்லாது என்று அறிவித்த பின் அவசர நிலை பிரகடனப்படுத்தியது எல்லாம் காங்கிரஸ் பெயரில் இருக்கிறது.

தி.மு.க S.I.R. தொடர்பாக வழக்கு தொடர்ந்திருக்கிறது (தமிழக அரசு சார்பாக தொடரவில்லை). நீதிமன்றத்தில் அவர்கள் என்ன சொல்கிறார்கள், வாக்காளர் பட்டியல் சீர்திருத்தம் வேண்டாம் என்று நாங்கள் சொல்லவில்லை. ஆனால், அது அவசரமாக செய்யக்கூடாது, இது மழைக்காலம், மாவட்ட பணியாளர்கள் எல்லோரும் மழை பாதிப்பு தொடர்பான பணிகளில் ஈடுபடுத்தப்படுவார்கள். இந்த திருத்தத்திற்கு முறையான கால அவகாசம் தேவை என்று மட்டுமே தான் சொல்லியிருக்கிறார்கள். நீதிமன்றத்தில் வாக்கு திருட்டு என்று அவர்கள் பேசவே இல்லை(பச்சைக்கிளி என்கிற வார்த்தையே வரல). ஆனால், அதே தி.மு.க வாக்கு திருட்டு என்கிற ராகுலின் கோஷத்தை மக்கள் மத்தியில் பிரபலப்படுத்துகிறார்கள். இது தான் இப்படி ஒரு உருட்டு அப்படி ஒரு உருட்டு என்பது.

அந்த கோஷத்தை தி.மு.க. எந்தளவு மக்கள் மனதில் விதைத்து விட்டது என்றால், ஒரு செய்தி சேனலின் தொகுப்பாளர் நேரலையில் பாஜக வழக்கறிஞர் ஒருவரிடம் பிஹாரில் வாக்கு திருடி ஜெயித்துவிட்டீர்கள் என்று கேட்கும் அளவு விதைத்து இருக்கிறார்கள். ஆதாரமில்லாத தனியொரு அரசியல் கட்சியின் பொய் பரப்புரையை ஒரு செய்தி ஊடகத்தின் தொகுப்பாளர் போகிற போக்கில் ஊர்ஜிதமான உண்மை போன்று கடத்துகிறார் அங்கே அவர் மன்னிப்பு கேட்டுவிட்டார் என்றாலும், ஒரு கருத்தை அவர் விதைத்து விட்டார் அதன் பின்னர் கேட்கப்பட்ட மன்னிப்பு எந்த பெரிய தாக்கத்தையும் ஏற்படுத்தாது. இப்படியாக தான் மக்களாகிய நாம் அரசியல்வாதிகளால் நமக்குள் ஏற்படுத்தப்படும் கருத்துக்களை உண்மை என்று நம்பிக்கொண்டு நாம் தன்னெழுச்சியாக அப்படி நினைத்து அரசியல் களத்தில் சில விஷயங்களுக்கு எதிரான மனநிலை கொண்டிருப்பதாக நினைத்துக்கொண்டிருக்கிறோம். ஆனால். உண்மையில் இப்படி கருத்துக்கள் நம்முள் விதைக்கப்படுகிறது.

 நீதிமன்றத்தில், வாக்கு திருட்டு நடந்திருக்கிறது என்று உப்புக்கு கூட இவர்கள் வாதிடவில்லை. முறையான கால அவகாசம் வேண்டும் என்று கேட்டவர்கள் எவ்வளவு கால அவகாசம் தேவை என்பதையும் குறிப்பிடவில்லை.ஆட்கள் பற்றாக்குறை என்று குறிப்பிடுகிறார்கள், இத்தனை பேர் இத்தனை நாட்கள் எடுத்துக்கொண்டால் தான் இதை செய்து முடிக்க முடியும் என்கிற எந்த திட்டமும் இவர்களிடத்தில் இல்லை. பொத்தாம் பொதுவாக எல்லாவற்றையும் எதிர்ப்பது போல் இதை எதிர்க்க வேண்டும் என்று வழக்கு தொடர்ந்து இருக்கிறார்கள். இடைக்கால தடை பிறப்பிக்க கேட்ட கோரிக்கையை நீதிமன்றம் நிராகரித்து விட்டது. இவர்கள் சொல்லும் காரணங்கள், இது தகுதியான வாக்காளர்களையும் நீக்க வழி செய்துவிடும் காரணம் பாரங்கள் பூர்த்திசெய்ய கடினமாக இருக்கிறது இது சிறுபான்மையினரை பாதிக்கும்( எப்போதும் அவர்கள் இடும் கோஷத்தை இதிலும் சேர்த்துக்கொண்டார்கள்).

மாநில அரசின் கீழ் இருக்கும் பணியாளர்கள் தான் இந்த பணியை செய்யப்போகிறார்கள். தேர்தல் ஆணைய கட்டுப்பாட்டில் இருந்தாலும் பணி செய்யப் போகிறவர்கள்  மாநில அரசின் பணியாளர்கள் தான். பாமரர் ஒருவருக்கு பாரம் பூர்த்தி செய்ய தெரியவில்லை என்றால் பணியாளர் உதவ வேண்டும். எப்படி பூர்த்தி செய்ய வேண்டும் என்ன செய்ய வேண்டும் என்பதற்கான வழிமுறைகளை தேர்தல் ஆணையம் வெளியிட்டு இருக்கிறது. அதையும் மீறி அதில் குழப்பம் இருந்தால் ஒரு முதல்வர் என்ன செய்யலாம், என்ன குழப்பம் இருக்கிறது என்பதை தேர்தல் ஆணையத்திற்கு சரியாக சுட்டிக்காட்டலாம் அவர்களிடம் விளக்கங்களை கேட்டு பெறலாம்.

பணியாளருக்கும் எப்படி பாரம் பூர்த்தி செய்வது என்று தெரியவில்லை என்கிறார் முதல்வர். நம் மாநில அரசின் கீழ் பணி செய்பவர்கள் அத்தனை தத்திகளாக இருக்க மாட்டார்கள் என்று நான் நம்புகிறேன். முதல்வரும் நம்ப வேண்டும். பணியாளருக்கு எப்படி பாரம் பூர்த்தி செய்வது என்று தெரியாது என்று சொன்ன அதே கட்சி தலைவர்கள். உங்கள் கட்சியினர் தான் பாரங்களை பூர்த்தி செய்து தருகிறார்களாமே என்று கேட்டால் உதவியிருப்பார்கள் என்கிறார்கள். அதாவது இந்த பணியாளர்கள் (BLO) வீடு வீடாக சென்று சரிபார்ப்பு செய்து திருத்தங்கள் இருப்பின் அதற்கான பாரங்களை கொடுத்து பூர்த்தி செய்ய உதவி அதை வாங்கிக்கொள்ள வேண்டும் என்கிற வழிமுறைகளை விட்டுவிட்டு மொத்தமாக பாரங்களை வாங்கி கட்சியினர் பூர்த்தி செய்து BLO களிடம் வழங்குகிறார்கள் என்கிற குற்றச்சாட்டை தான் உதவி என்கிறார்கள்.அதாவது படித்துவிட்டு அரசு ஊழியம் செய்கிறவர்களுக்கு குழப்பமாக இருக்கும் பாரத்தை கட்சியினர் எளிதாக பூர்த்தி செய்து உதவுகிறார்கள். எப்படி?!

 வாக்காளர் பட்டியல் சீர்திருத்தம் மிக முக்கியமானது. அது செய்தாக வேண்டும் தான். அது செய்யமால் விட்டாலோ. அதை செய்வதில், கட்சியினர்களின் குறுக்கீடு இருந்தாலோ அந்த சீர்திருத்தங்கள் சரியாக செய்யமுடியாமல் போகலாம். அதுவே தான் வாக்கு திருட்டுக்கு வழிவகுக்கும்.

இதற்கு நேரடியாக ஆதாரை வாக்காளர் அடையாள அட்டையோடு இணைக்கலாம் என்று கேட்டால், அதற்கும் பதில் இருக்கிறது.தேர்தல் ஆணையம் அந்த முயற்சியையும் எடுத்தது. ஆனால், அது அரசியலமைப்பின் படி சரியான வழிமுறை அல்ல என்று வழக்கு தொடரப்பட்ட  பின்; தேர்தல் ஆணையம்,  ஆதாரை வாக்காளர் அடையாள அட்டையோடு இணைப்பது கட்டாயமில்லை என்று விட்டது. வாக்காளர் அடையாள அட்டை ஆதார் உடன் இணைக்கப்படும் வரை இந்த சீர்திருத்தங்கள் ஒரு தொடர் நடவடிக்கையாக இருக்க வேண்டியது அவசியமாகிறது. ஆதாரை இணைப்பதில் ஒரு சிக்கல் என்னவென்றால், ஆதார் தேசிய குடியுரிமை சான்றாகாது என்று இந்திய அரசு அறிவித்து இருக்கிறது. அது இருப்பிட சான்று மட்டுமே. ஆதாரை வாக்காளர் அடையாள அட்டையோடு இணைப்பதால் மட்டும் வாக்காளர் பட்டியிலில் உள்ள குழப்பங்களை சரி செய்து விட முடியாது. இங்கே உங்களுக்கு ஒரு கேள்வி எழலாம் எது தான் குடியுரிமைக்கான அடையாளம். தேசிய குடிமக்கள் பதிவேடு(NRC) அது இந்தியாவில் கொண்டு வரப்படவேண்டும். வளர்ந்த நாடுகளிலெல்லாம் தேசிய அடையாள அட்டை என்று ஒன்று அந்த நாட்டின் குடிமக்களுக்கு வழங்கப்படுகிறது, வெளிநாடுகளில் இருந்து வந்து வேலை செய்கிறவர்களுக்கு ஒரு தனி அடையாள அட்டை வழங்கப்படுகிறது. இதில் அந்த நபர்களின் எல்லா தரவுகளும் இணைக்கப்படுகிறது. அதனால், அங்கே இப்படி குழப்பங்கள் இருப்பதில்லை.

அதிகார வேட்கையில், நிர்வாக சீர்திருத்த நடவடிக்கைகளை எல்லாம் எதிர்த்தே பழகிய அரசியல்வாதிகள் நாட்டின் முன்னேற்றத்தை தடுக்கிறவர்களாக தான் இருக்கிறார்கள். அவர்களுக்கு இங்கே இருக்கின்ற குழப்பங்கள் அப்படியே இருக்க வேண்டும் அல்லது வெகு காலத்திற்கு பிறகு தான் சரி செய்யப்பட வேண்டும். அதனால் தான் தேசிய குடிமக்கள் பதிவேட்டை(NRC) எதிர்த்தார்கள், வாக்காளர் சீர்திருத்த நடவடிக்கையை(SIR) எதிர்க்கிறார்கள். ஆனால், இதையெல்லாம் மக்களுக்காக செய்வது போல காட்டி நமக்குள்ளும் அதற்கு எதிரான மனநிலையை வளர்த்துவிடுகிறார்கள்.சுதந்திரத்திற்கு முன்னும் பின்னும் நமக்காக(மக்களுக்காக) என்று காட்டப்பட்ட பெரும்பாலான எழுச்சிகளும் போராட்டங்களும் எதிர்ப்புகளும் தனி மனித அதிகார வேட்கைக்கு தீனி போட்டிருக்கிறதே அன்றி அநேகமான சமயங்களில் மக்களுக்கு எதிரானதாக அது இருந்திருக்கின்றது.

இதெல்லாம் மாற வேண்டுமென்றால், நாம் ஒவ்வொருவரும் அரசியல் பொறுப்புள்ளவர்களாக இருக்க வேண்டும்.நாம் படித்த பண்பட்ட சமூகமாக வளர்ந்துவிட்டோம். அரசியலை நிர்வாக கண்ணோட்டத்தில் அணுக வேண்டும். இந்த பிரச்சனைகளை உதாசீனப்படுத்துவதும், அல்லது அரசியல்வாதிகள் ஆட்டுவிக்கும் பொம்மைகளாய் இருந்து அவர்களின் அதிகாரபசிக்காக கிளப்பப்படும் பொய்களை நம்பி சில சீர்திருத்தங்களை எதிர்ப்பதும், நம் கண்ணை நாமே குத்திக்கொள்வதை போன்றது. நாமாக முன்வந்து கூட ஆன்லைனில் நம் வாக்காளர் அடையாள அட்டையில் செய்யப்படவேண்டிய திருத்தங்களுக்காக விண்ணப்பிக்கலாம். இப்படியெல்லாம் தான் நாம் நம் அரசியல் பொறுப்பை வெளிப்படுத்த வேண்டும்.அப்படியிருந்தால், நம்முடைய வாக்கை செலுத்த நாம் முனைப்பு காட்டினால் நம் வாக்குகளை யாரும் திருட முடியாது.